Ok

En poursuivant votre navigation sur ce site, vous acceptez l'utilisation de cookies. Ces derniers assurent le bon fonctionnement de nos services. En savoir plus.

chant de noël normand

  • Chant de noël Normand: L'Êfant à Béthléhem

    Chutte fête dé Noué j'allons mèrtchi auve tchoeu et bouoche et yi en mémouaithe dé not' Jésû Chri: l'êfant à Béthléhem Driéthe i' laîssit l'Paradis et siez nous i' d'valit, né pouor nous dé la Vièrge Mathie: l'êfant à Béthléhem Épis les anges chantîtent ès cieux et vîntent nos dithe qu'achteu pouor nous i' fut né, not' Saûveux: l'êfant à Béthléhem Tchi grand amour, tchi sîngne dé paix qué l'Angné nos fit vaie, quand Jésû géthit dans la chai: l'êfant à Béthléhem Glouaithe à Dgieu dans les pus hauts lieux tchi règne atout bonheu; J'viyons san d'si divîn achteu: l'êfant à Béthléhem

  • Chant de noël normand: Les bein bouonnes bêtes

    Jésû, not' Saûveux, l'Jour dé Noué,
    dans eune vielle êtabl'ye i' fut né
    auve les bein bouonnes bêtes à l'èrgarder:
    Jésû, not' Saûveux, l'Jour dé Noué.

    Mé, dit l'ânon ès longues ouothelles,
    j'portis sa méthe, Mathie la belle
    souos l'caud solé epis l's êtailes,
    mé, dit l'ânon ès longues ouothelles.

    Mé, dit la vaque couleu dé myi,
    j'lî baillis man tro pouor lé couochi
    épis man fain pouor s'n ouothilyi,
    mé, dit la vaque couleu dé myi.

    Mé, dit la brébis ès cônes corlées,
    j'lî baillis d'ma laine pouor san blianket,
    d'la laine pouor l'enfliuber au liet,
    mé, dit la brébis ès cônes corlées.

    Mé, dit la colombe, blianche coumme la né,
    j'fis coucouroux pouor lé bèrchoter,
    j'fînmes coucouroux, ma douoche et mé,
    mé, dit la colombe, blianche coumme la né.

    Les bein bouonnes bêtes, bénites et belles,
    racontent châtcheune sén alibèle:
    coumme dans l'êtabl'ye si néthe et vielle,
    il' atchilyîtent Emmanuel.

    Jésû, not' Saûveux, i' fut né
    dans eune êtabl'ye lé Jour dé Noué,
    auve les bein bouonnes bêtes à l'entouother:
    Jésû, not' Saûveux, i' fut né.